Norsk Fjellmuseum - Jotunheimen og Reinheimen nasjonalparksenter ligg midt i Lom sentrum, og er ein viktig innfallsport til fjellet og nasjonalparkar.

Norsk Fjellmuseum opna i 1994, og er landets einaste museum der samspelet mellom mennesket og fjellet er hovudtema. I sentrum av Lom, med tre nasjonalparkar utanfor, finn du spanande og moderne utstillingar, der bilete, lyd, lys og gjenstandar syner korleis folk har gleda seg over, og brukt fjellet frå istida og fram til våre dagar. I tillegg er det naturgeografisk utstilling på museet, og ei rekkje stuttvarige utstillingar i samband med arrangement i området.

Norsk Fjellmuseum er autorisert som nasjonalparksenter for Jotunheimen og for Reinheimen. Nasjonalparksenteret skal være ei ope dør til natur og naturopplevingar. Det betyr at Fjellmuseet har eit særleg ansvar for informasjon og formidling av nasjonalparkane. Dette skal skje i samhandling mellom Fjellmuseet og forvaltningsstyresmakta.