|
| Skjøtsel og tilrettelegging |
| I verneområda blir ikkje naturen overlate heilt til seg sjølv. Det blir drive aktivt skjøtselsarbeid både i Jotunheimen og Utladalen. Dette blir gjort både for å reparere skader i naturen og for å ta vare på ein naturtilstand eller eit kulturminne. |
| Skjøtselsarbeidet krev ofte både god naturkunnskap og praktisk handverk. Skjøtselsarbeid kan t.d. vere restaurering av stiar, restaurering av gamle buer og hus, rydding og slått av gamal kulturmark. |
 |
| Geit, sau og hest blir slept på beite i enkelte område for å halde vegetasjonen nede. Det er særleg i Utladalen og ved Gjendebu at det årleg blir lagt ned mykje skjøtselsarbeid. Her ønskjer ein å ta vare på spora etter tidlegare tiders bruk av utmarka og fjellet. |
 |
| Tilrettelegging, rydding, merking og skilting av ferdselsvegar og stiar er eit omfattande arbeid som krev årleg innsats. Likeeins må bruer over elver og bekkar haldast vedlike. Nokre av bruene må takast ned kvar haust for ikkje å bli tekne av vårflaumen. |
 |
| Skjøtsels- og tilretteleggingstiltaka blir som regel utført i eit samarbeid mellom grunneigarar, DNT, kommunane, Fylkesmannen, Statens Naturoppsyn og fjellstyra. |
|
