Reinheimen nasjonalpark ligg i det nest største inngrepsfrie området i Sør-Noreg, og villmark pregar dette særs varierte fjellområdet. I vest finn du eit dramatisk landskap med kvasse tindar og egger, botnar, urer og strie elver. Mot Romsdalen, er det kring 1000 meter fritt fall ned Trollveggen. Austover vert terrenget slakare med vidder og rolege flyer. Dalane er breiare og elvene flyt stillare. Det høgste fjellet i nasjonalparken reiser seg over 2000 moh, medan det lågaste punktet ligg under Trollveggen ca. 130 moh.
  


Her finn vi mykje av det opphavlege fjelløkosystemet med villrein, jerv, kongeørn, jaktfalk og ryper. Villrein finn gode beiteområde her heile året. Reinheimen er rik på kulturminne etter den gamle villreinfangsten. Her er fangstgroper, massefangstanlegg, bogestelle og restar av gamle buplassar til fangstfolka. Folket i bygdene rundt Reinheimen har vore nær knytt til fjellet, og i dalane inn mot nasjonalparken finst fleire setermiljø. Utnytting av beiteressursane til sau og storfe er framleis viktig.

Reinheimen kan by på allsidige og rike turopplevingar. I Tafjordfjella og vestlege delar av Skjåk finst merka stiar og turisthytter i og inntil nasjonalparken. Det finst og ein del hytter til utleige. Av omsyn til den sårbare villreinstammen har det ikkje vore ønskje om større ferdsel inn i området. Skal du ferdast i desse områda, må du basere deg på å bere telt og anna utstyr i ryggsekken.